من القصص الشعبي للشاعر محمد عليش

.. من القصص الشعرى ..

.. وسط رواية الباب الخلفى ..

.. بالعاميــــــة المصريــــــــة ..

.. الجزء الخامس .. الأخيــــــــر ..

.............................

............... ( النامصةُ والزَجَّــــــال ..)

أقعد هِنا .. تعلا لى جمبى .. وشوية مالت بالأغصان ..5

عليا .. فى إيديها صينية .. عليها كاس فاضى (كريستال) ..

وعليها علبة دهبية .. مدهونة رقة وحنية ..

مليانة بالشهد الفتاك .. شيكولاتة معجونة بالكونياك .

انا شفتها .. دُخت .. خطية ..

هادية الجموحة شيطان فى ملاك ..؟

حصل تداخل طيفى رهيب ..

بين الحطب ومابين النار ..

وعلى إيدين ( هادية ) الانسان ..

قربت مسافات الابداع ..

ودابت حروفنا فى الاستقبال .

باقى دقايق عالميعاد .. وفجأة ..

لاح فى الجو ضباب ..!

راجل شباب وف طول الباب ..

ومعجبانى .. .شايف نفسه ..

(قرنى ابو مسلم نفسه ) .

بغرور كتير .. من غير دستور ..

ولا ( إحم ) ولا حتى سلام ..

خش – بكلامه – فى مزاجى شمال .. !

ودا من من خصال بعض الكهان ..

وخصال رجال اعمال جهال .

زعق .. وقال اللى ما ينقال :-

مش عيب كده يا راجل بطال .. ؟

يا .. واحد طلع م الدنيا وشاب ..

مش عيب كده يابو عين زايغة .. ؟

فوق الحرام بترش كلام .. ؟!

ليه بتغازل فِ سكرتيرتى ..

مفتاح سر اعمالى وجارتى .. ؟

رديت وقلت :-

انا غرضى بسيط . .

قصدى أنفّع واستنفع .. مش برضه ده ..

مكتب لوسيط ..

فى جواز ب (كاش) او بالتقسيط .. ؟

وسيط لفك نحوس البخت ..

عنده حلول لفراغ من تلج ..

وغول كاّبة اوسخط وكبت ..

وظلم غربة ووحدة وهجر .

وسيط حلول حوجة وعوزة ..

وعنوسة .. ولعكوسات النجم ..

وللعنة الفرعون فيه حل ..

وقراية الفنجال والكف ..

عنده حلول لأبو بخت اسود ..

وابوقلب زيه بلون الفحم ..

وسيط بتاع كله ..

حتى الحبوب الزرق .. تلاقيها فى محله ..!

سكت شوية وقال :-

طلبك .. ولخص بقا فى القول ..

مع بسمة صفرا منه قال : -

شكلك خبص لى .. عامل دماغ .قبل ما تيجى ..

وجاى رايق قوى .. مرتاح ..!

قلت :-

ارزاق يا دنيا لناس غير ناس ..

كان نفسى اشوفه بأى فلوس ..

لكن بأه ببلاش شفته..

ومراد عيونى خلاص نلته ..

ونفسى دلوقتى فِ جيرته ..

وأقول له كل اللى ما قلته ..

انقل له كل اللى عايشته ..

ومت فيه بعد ما عشته .

هادية الجموحة جندول ..

هاقول لها المختصر ..

لازم أهزم المجهول ..

وعلى خريفى أنتصر :-

شراع هواكى إنطوى من يلاكى ..

ومجداف لقاكى إنكسر من (مِسَلِم )..

ودفة رضاكى بمركب هناكى ..

حدفها صباكى ببحر( المعلم ) .

يا موج شط بحرى ..

ونسماية بدرى .. لدمى بتجرى ..

وتدينى حبه .. تقويلى عزمى ..

أقول :-

مش كفايـــــــــــــــــــــــــــة ..!

حروفى وسيلة .. نبيلة لغايــــة ..

يا غاية جميلة .. يا أبدع حكايــة :-

شراعى بهواكى .. هجدد هـواه ..

ومجداف لقاكى .. راح أجبر جفاه ..

ودفة رضاكى .. بمركب هناكـــى ..

بحبه ( سماوى ) .. تعود للحيــاة ..

تعـــــــــوووووود للحيـــــــاااااااااة ..!

* * * *

كلمات  / محمد عليش متولى

من القصص الشعرى بالعامية المصرية

المجموعة السادسة (النامصة والزجال )

النص إكتمل .

الإيداع القانونى / 19590/ 2010

الترقيم الدولى / I S B N / 977 - 17- 9622-- 4

•