( إسطبـــــــل قرنــــــــى .... ) الشاعر محمد عليش

.. بالعامية المصرية ..

.. من القصص الشعرى

.. النص مكتملا ..

( إسطبـــــــل قرنــــــــى .... )

.

تلج الفراغ إشتعل..فقلت أقوم أطفيه..

سألت نفسى سؤال..جاوبت بروحها عليه ..

الفكر بيا إشتغل..وشار عليا أداريه ..

أداريه بإيه يا بيه ؟ قاللى داريه يا نبيه :-

حكى..وشعر ..وزجل وحط إسمى عليه .

طليت على الجرنان..لقيت كذا إعلان ..

فى حى راقى مكان..مكتب مرخص تمام ..

مهمته إنسان..ميت وروحه فيه ..

وإن صح تعبيرى.. ميت وديله كاويه .

خنقت تليفونى .. وقلتله إتكلم..إنطق وقول :-..

إعترف ..

إلعب ف ودن المعلم..اللى فتح مكتبه ..

إسطبل خيل عالنيل ..( قرنى أبو مسلم ) .

دماغه مليان أرامل ..ومطلقات بالهبل ..

وبنات عوانس عسل ..وزباينه م الأخر..

أغلبها من ع ( النت ) ..راجل عزوبى أو ست ..

أو شاب نفسه ف ( مزه ) ..معروض عليه كذا بنت .

( قرنى ) الوسيط الحويط..عنده فلوس فى الدرج ..

و له حساب فى البنك .. عنده جواز بالقسط..

وجواز – كمان – بالأجل .

عنده اللى قادرة وشاطرة ..واللى حداها السكن ..

جواز لمدة سبوع .. أو بالكتيرسبوعين ..

أو ليلة واحدة وبس ..أو فى السبوع يومين ..!

يا للا أوام بالعجل..إختار شريكة حياتك ..

من صفوة المجتمع ..أو تحت خط الفقر .

* * *

على نمرة الاسطبل ..رنيت من المحمول ..

عاللى حداه (بيقول ) : - حلول لتلج الفراغ ..

ولغول كاّبه وكبت..أو شبح غربة ووحدة..

حلول لحوجة وعوزة..وأفول ف ضى النجم..

وللعنة الفرعون.. ولفك نحس البخت .

وكل الذى منه .. لاّخر المشوار.. مكتب بتاع كله ..!

رنيت .. ردت عليا صبيه..صوتها ولا الكروان ..

مدلعاه لى شويه..مزوقاه بحروف .. منقوطه عطف وحنان ..

بتسيل هيام وغرام ..زى كده بالتمام :-

ألووووووو..مين معايا..؟..أهلا يا بيه بيك معانا..

ياااااااه..دا إنت باشا يا بيه ..وألف تتمناك ..

قلتلها :-

إسمك إيه .. ؟

قالتلى :-

هادياااااا أوى .. هادية (الجموحة) يابية ..

فاجئتنى بنت الإيه .!

عاوزانى اكون فارس..وأجهز العدة ..

وأرد رد مناسب على طاقة مفتوحة ..بتطل عالعالم .

آاااااه .. من جوه جوايا ..!

آااااه .. من برد أيامى ..

آااااه ..يا دنيا يا حرامى ..سرقتى ليه شبابى .. ؟

ووقفتى على بابى .. تطلعى لسانك ..!

رديت على هادية..وكلى يتمنى .. الصوت مع الصورة ..

يا سلام يا بو مسلم ..يا قرنى يا معلم..

أول قصايدك غنا..ولحن رج الفضا..وخلى خرسى وسكاتى ..

ينطق ويتكلم..يا قرنى..ياااااااا معلم ..!

ضحكت بلون بمبى .. و بكلها قالتلى :-

طب قوللى يا صاحبى ..شاعر وعزبنجى .. ؟!

إزاى دى تيجى يا ناس ..!

الشعرا دول أمرا ..لو حتى كانو مماليك .

رديت وقلت :-

يا هادية..أنا ملك روحى وحر ..ونبض قلبى حر ..

وخط قلمى حر .. وشعرى – برضك – حر .

قالتلى :-

أهلاااااااا بيك ..يا ريت تسيب إسمك..وتقوللى إيه طلبك..

يتيجى لو حبيت .. أقله نتعرف..ويبقى ده أحسن ..

تيجى ..؟..نشوف ونتشرف ..وجها لوجه يا بيه ..

يااااه جرجرتنى فى الكلام..اّااااه منكو يا شعرا ..

و(..) كلمة من طرف اللسان..حرفين دلع.. من ( أهازيج ) الغرام .

نفسى ف قصيدة منك ..توصف محاسن جمالى.

الفكرة جات منها ..وهيه جوايا.. (المزه) سبقتنى ..

دعتنى ..يا هنايا .

دى شغله مدروسه..والخطوة محسوبة..أروح..؟

أروح .. راح أخسر إيه ؟

أقله يرتاح فضولى..وأشوف نظام عولمة ..جديدة ف حقوق الانسان .

وافقت عالفكرة..وخدتلى ميعاد قريب..من المعلم قرنى ..

وبلغتنى ان ده..مخصوص لخاطر عيونى .. المغرمين بالجمال .

جهزت نفسى لمعادها..وضبت كل الامور..ورحت أجرى بنشاط ..

ألحق مكان عالبساط .. اللى انفرش بالحوار..عن عولمة انسان ..

له حق فى الاحسان ...!

* * *

وقبل ما أوصف لك هاديه .. أوصف لك المكتب يا همام :-

مكتب فى دور ع (الروف ).. فوق السطوح عالى ..

مفيش عليه سكه لسكان..غير اللى قاصده من الثوار ..

الواجهه أبهه ع الاّخر.. ومدخل الاسطبل تمام ..

والصالة مبدورة بالسجاد..وكراسى جلد بقاعدة سفنج ..

وأبليكات ..وكتير مرايات.. ونجفة مليانة كريستال.. !

* * * * *

مكتب لذيذ ..من نوع (هيلاهوب) ..وفوقه صحبة فى إيد (فازه)..

ورد وفل من الطازة..وجهاز حديث جدا.. (لاب توب)..

وعلبتين مناديل (كلينكس) وفى ركن شلته خصوصى للست..

الست هادية السنيورة .. صوت عندليبى ..ف قد غزال...

صوت عندليبى ف قد غزال..أو مهرة لسة علوم فى سباق ..

والبشرة قز حليبى .. يا خال .. بياض طبيعى بحمار خدين..

وشعر ناعم متسرسب.. غامق بلون الليل فاحم ..

طويل وهادل ع الردفين .. فوق الكتاف نازل يهبل .. أما العيون ..

فعيون ظبيان .. وحورها فوق وصف الانسان ..

ليها حواجب ع الفتلة .. ورموش سهام ميبطلوش ..

طعن فى ننى العين احلام .. مبيرحموش قلب المسكين .

الرموش فوق العيون .. بعتت رسالة مصورة...

والعبارة مزوقة بحروف ندية معطرة .. ومعاها

صحبة من الورود بعبيرعسل .. للأمل بتقول

حكاوى مسطرة .. والشفايف كاس أنا ناس .. تتمنى روحك

والأحساس .. رشفة خفيفة ولا إتنين .. من بسمة حلوة مسكرة ..

فوق شفايف (روش) لذاذ .. عليها نسمة معطرة .. من سكرة

بتدوب حنان .. وبدون خجل بدرت غزل .. من قد فن وسحر حسن ..

مستخبي ورا الهدوم .. قد زي غصون البان .. والكف بض ..

عجين (فينو) .. وصوابعه موز بلدي بريحة ..

لكنه مستوي ع الهانة .. سنيورة لآبسة ..

(قزح) شفاف .. هفهاف .. غازلتها ب ألآطة ..

ردت عيونها ببساطة : - كل منايا أكون وياك .. ف براح قلبى ..

تفضى شقاك .. وعلى كتافك أحط أمالى .. وأفرد حبى ..

شر اع فى هواك .. كل منايا (قصة) لحبى .. قصة لبكرة..

قصة لبكره ويومى وامبارح .. قصة لأملى ..

قصة لحلمى .. قصة لبوحى وولعى الجارح ..

كل منايا أبقى حكاية .. أبقى رواية فصولها معاك ..

حقيقة رقيقة تطول وياك .. أنا دلوقتى بحس وجودك ..

قلبى بإيدى مسكاه من خوفى ..إنك ترفض ..

نقطف سوا من زهر الورد .. نقطف سوا ..

من زهر الورد .. ونرشف عطر الهوى والحب ..

ونروى شقوق ومروج القلب .. ونغسل روحنا ..

ونغسل روحنا بلحظة وصل .. تساوى ساعات ..

بلحظة وصل تساوى ساعات ..

لحظة وصل تساوى العمر.

قلت :-

الله .. الله ع الشعر .. غـُنى مع بوح .. بيردو الروح ..

ضحكة ضحكة .. بلون الخوخ .. شفت خدوخها بلون الجمر ..

قلت :-

يكفيك كام يا مدام فى الشهر .. ؟ ضحكة ضحكة بلون الصبح ..

مال فى الحال .. شعرها ع الضهر قلتلى :- ... يا بيه ..

دا كلا ينقال .. ؟ .... أنا بختار شاعر قصاص ..

قلبى لسرده رق ومال .. فقلت أنعينى .. الماضى والحال :-

ضيعت عمرى - أنا - فى الأسفار ..! ..قلتها بصوت (عبد الوهاب )..

(فى سرى) .. أنا من ضيع فى الأسفار شعره ..!

قلتلى :-

إيه .. ؟

قلتلها : -

مفيش ..

دامطلع النص الشعرى .. اللى نويت أكتبه فيكى ..

قلتلى :- ... بسرعة كده من غير ترتيب .. ؟

قلتلها :-

اّه .. وليه الترتيب .. ؟

دا قرينى رهيب .. لما يشوفنى فى بحر الحب ..

يرمي لى طوق مليان هوى عشق ..

وأما يشوفنى فى بحر الشوق ..

يبني لى بيت على شط القـُرب ..

وأما يشوفنى لوحدى حزين ..

يلا غينى أقوم أهز الأوتار ..

ولما أكون بارقص فرحان ..

يدينى كاس مليان أفكار .

قرينى جالى يغرقنى .. فى بحرك العطشان أشعار.

وأنا لما شفتك وسمعتك .. ماكنش حلم غريب ع العين .

وماكنش لحن غريب ع الودن .

قالتى :-

ياااااااااه .. دا إنت يا أستاذ .. أوى أوى للهوى حساس .

مش بس جواهرجى مشاعر .. دانت أديب مبدع فنان .

أقعد هنا .. تعلا لى جمبى .. وشوية مالت بالأغصان ..

عليا .. فى إيديها صينيه .. عليها كاس فاضى (كريستال) ..

وعليها علبه دهبية .. مدهونة رقة وحنية ..

مليانة بالشهد الفتاك .. شيكولاتة معجونة بالكونياك .

أنا شفتها .. دُخت .. خطية ..

هادية الجموحة شيطان فى ملاك ..؟

* * * * *

حصل تداخل طيفى رهيب ..

بين الحطب ومابين النار ..

وعلى إيدين ( هادية ) الانسان ..

قربت مسافات الإبداع ..

ودابت حروفنا فى الإستقبال .

باقى دقايق عالميعاد .. وفجأه ..

لاح فى الجو ضباب ..!

راجل شباب وف طول الباب ..

ومعجبانى .. .شايف نفسه ..

(قرنى أبو مسلم نفسه ) .

بغرور كتير .. من غير دستور ..

ولا ( إحم ) ولا حتى سلام ..

خش – بكلامه – فى مزاجى شمال .. !

ودا من من خصال بعض الكهان ..

وخصال رجال أعمال جهال .

زعق .. وقال اللى ما ينقال :-

مش عيب كده يا راجل بطال .. ؟

يا .. واحد طلع م الدنيا وشاب ..

مش عيب كده يابو عين زايغة .. ؟

فوق الحرام بترش كلام .. ؟

ليه بتغازل فِ سكرتيرتى ..

مفتاح سر أعمالى وجارتى .. ؟

رديت وقلت :-

أنا غرضى بسيط . .

قصدى أنفّع وأستنفع .. مش برضه ده ..

مكتب لوسيط ..

فى جواز ب (كاش) أو بالتقسيط .. ؟

وسيط لفك نحوس البخت ..

عنده حلول لفراغ من تلج ..

وغول كاّبه أو سخط وكبت ..

وظلم غربة ووحدة وهجر .

وسيط حلول حوجة وعوزة ..

وعنوسة .. ولعكوسات النجم ..

وللعنة الفرعون فيه حل ..

وقراية الفنجال والكف ..

عنده حلول لأبو بخت اسود ..

وأبوقلب زية بلون الفحم ..

وسيط بتاع كله ..

حتى الحبوب الزرق .. تلاقيها فى محله ..!

سكت شوية وقال :-

طلبك .. ولخص بقا فى القول ..

مع بسمه صفرا منه قال : -

شكلك خبص لى .. عامل دماغ .قبل ما تيجى ..

وجاى رايق قوى .. مرتاح ..!

قلت :-

أرزاق يا دنيا لناس غير ناس ..

كان نفسى أشوفه بأى فلوس ..

لكن بأه ببلاش شفته..

ومراد عيونى خلاص نلته ..

ونفسى دلوقتى فِ جيرته ..

وأقول له كل اللى ما قلته ..

أنقل له كل اللى عايشته ..

ومت فيه بعد ما عشته .

هادية الجموحة جندول ..

هاقول لها المختصر ..

لازم أهزم المجهول ..

وعلى خريفى أنتصر :-

شراع هواكى إنطوى من يلاكى ..

ومجداف لقاكى إنكسر من (مسلم )..

ودفة رضاكى بمركب هناكى ..

حدفها صباكى ببحر( المعلم ) .

يا موج شط بحرى ..

ونسماية بدرى .. لدمى بتجرى ..

وتدينى حبه .. تقويلى عزمى ..

أقول :-

مش كفايـــــــــــــــــــــــــــة ..!

حروفى وسيلة .. نبيلة لغايــــة ..

يا غاية جميلة .. يا أبدع حكايــة :-

شراعى بهواكى .. هجدد هـواه ..

ومجداف لقاكى .. راح أجبر جفاه ..

ودفة رضاكى .. بمركب هناكـــى ..

بحبه ( سماوى ) .. تعود للحيــاة ..

تعـــــــــوووووود للحيـــــــاااااااااة ..!

* * * *

كلمات الشاعر الأديب / محمد عليش متولى

من القصص الشعرى بالعامية المصرية

المجموعة السادسة (إسطبل قرنى)

النص مكتملا .

الإيداع القانونى/ 19590/ 2010

الترقيم الدولى/ I S B N / 977 - 17- 9622-- 4

•